Steiktur lax með fenníkusalati og raita-sósu

Lax er lúxus matur, hvort sem hann kemur úr eldi eða er veiddur á stöng í ám eða jafnvel í sjó. Hann er fullur af omega3 fitusýrum og annarri hollustu og bara einstaklega góður á bragðið, nánast sama hvernig hann er eldaður. Og svo er fjölbreytnin í uppskriftum nánast óendanleg, því lax er borðaður um veröld víða.

En við förum ekki langt eftir uppskriftinni, sækjum hana upp á Skaga, því hún er fengin frá Norðanfiski á Akranesi, en fyrirtækið heldur úti fyrirtaks uppskriftasíðu og selur auk  þess fiskinn í þær.

Innihald:

• 800 g lax

Fenníkusalat

• 1 góður fenníka (fennel), skorin eins þunnt og hægt er
• Safi úr ½ sítrónu
• Salt og pipar
• ½ rauður chili
• 2 msk jómfrúarolía

Raita-sósa

• 1 meðalstór agúrka
• 300 ml hein jógurt
• Ögn af chili-fræjum
• ¼ tsk mulið kóríander
• 60 g rauðlaukur, fínsaxaður
• 1 msk sítrónusafi
• 3 msk fersk minta, fínsöxuð
• Svartur pipar, nýmulinn

Aðferð:

Fenníkusalat: Öllu blandað vel saman í skál og geymt í u.þ.b.10 mín.

Raita-sósa: Agúrkan er skræld, skorin eftir endilöngu og kjarninn tekin úr, skorin í þunnar sneiðar og sett í skál með 1 tsk af salti og geymd í 30 mín. Blandið jógúrtinni saman við saltaða agúrkuna, chili-fræin, sítrónusafann, rauðlaukinn, ögn salti og pipar, mintu og kóríander. Blandið vel saman og setjið í kæli (geymist vel í 24 tíma).

Steikið laxinn vel í olíu á vel heitri pönnu í u.þ.b. 3–4 mín. á hvorri hlið, kryddið með salti og pipar. Berið fram með fenníkusalati og raita-sósunni.