Mismunandi íshlutfall
Fiskistofa birtir nú niðurstöður vigtana m.t.t. íshlutfalls hjá þeim vigtunarleyfishöfum þar sem veiðieftirlitsmenn Fiskistofu hafa viðhaft eftirlit með endurvigtun á tímabilinu 1. nóvember til 31. desember 2018. Allnokkur munur er á íshlutfallinu í sumum tilfellum eftir því hvort eftirlitsmaður var viðstaddur vigtun eða ekki. Sá munur var í báðar áttir; ýmist var minni ís við yfirstöðu eftirltsmanns en uppgefið meðaltal eða hlutfallið var meira.
Taflan hér að neðan sýnir samanburð á vegnu meðalíshlutfalli hvers vigtunarleyfishafa þegar eftirlitsmaður var ekki á vettvangi og íshlutfallinu þegar eftirlit var haft með vigtuninni.
- Vegið meðalíshlutfall er íshlutfall vigtunar þegar tekið er tillit til heildarmagns sem vigtað er í öllum vigtunum frá tilteknu skipi hjá viðkomandi leyfishafa.
- Þessi tala er borin saman við íshlutfallið þegar eftirlitsmaður er viðstaddur endurvigtun og mismunurinn í prósentustigum er birtur.
Taflan sýnir einnig heildarafla sem viðkomandi skip landaði hjá vigtunarleyfishafanum á tímabilinu.
Ástæður breytilegs íshlutfalls geta verið margvíslegar. Það er hlutverk Fiskistofu að hafa eftirlit með að vigtun á sjávarafla sé sem réttust. Til þess að rækja það hlutverk sem best beitir Fiskistofa margvíslegum aðferðum og má í því sambandi nefna samvinnu við útgerðir og vinnslur, áhættugreiningu og aðgengi allra að upplýsingum um veiðar og afla.
Skýringar:
- Blaðsíðutölin á myndinni vísa á gögn um viðkomandi landanir og endurvigtanir í skjalinu hér að neðan.
- Feitletruðu hlutfallstölurnar sýna í prósentustigum mismuninn á íshlutfalli í aflanum við endurvigtun að viðstöddum eftirlitsmanni í samanburði við meðalísmagn í öllum afla viðkomandi skips sem aðili vigtaði á tímabilinu án viðveru eftirlitsmanns. Mismunurinn birtist í prósentustigum.
- Svo dæmi sé tekið er efst á listanum aðili þar sem íshlutfallið í aflanum var að meðaltali 25,08% en við yfirstöðu eftirlitsmanns reyndist það 19,11%. Mismunurinn er 5,97 prósentustig sem íshlutfallið er lægra við yfirstöðu en það var í aflanum að jafnaði á tímabilinu.
Grunngögn um hlutfall kælimiðils hjá vigtunarleyfishöfunum
Í gögnunum eru þær vigtanir þar sem eftirlitsmenn hafa verið viðstaddir auðkenndar með bláum lit en aðrar vigtanir eru sýndar gráar.
