25.700 máltíðir á mínútu

Nýliðið ár var enn eitt metárið í útflutningi sjávarafurða frá Noregi. Alls fluttu þeir út 2,7 milljónir tonna á árinu að verðmæti 1.368 milljarðar íslenskra króna. Það er vöxtur um 4% í magni og 5% í verðmæti miðað við árið 2017. Þetta svarar til 37 milljóna matarskammta á hverjum degi á síðasta ári eða 25.700 máltíða á mínútu.

Útflutningur til landa innan ESB hefur aukist að verðmætum vegna minni samkeppni og hagstæðrar gengisþróunar norsku krónunnar gagnvart evru. Samdráttur hefur hins vegar orðið í útflutningi til Asíu vegna vaxandi samkeppni og opnari markaðs fyrir sjávarafurðir í Kína.

Á síðustu 10 árum hefur verðmæti úrfluttra sjávarafurða frá Noregi vaxið um 156%. Hlutfallið milli fiskeldis og veiða breyttist lítið frá árinu 2017. Hlutur fiskeldis af heildinni er 72% mælt í verðmætum og 40,5% af magninu.

Alls fóru utan 1,1 milljón tonna af afurðum úr fiskeldi í fyrra að verðmæti 981 milljarður íslenskra króna. Það er vöxtur um 5% bæði í magni og verðmæti.

Afurðir úr fiskveiðum voru 28% heildarinnar mælt í verðmætum og 59,5% að magni til. Það var vöxtur um 2% í magni og 4% í verðmæti.