Pönnusteiktur lax
Íslenskt laxeldi sér okkur fyrir ferskum laxi alla daga ársins, en við borðum hann reyndar ekki á hverjum degi. Lax er sérlega hollur og góður matur og því sjálfsagt að hafa hann reglulega í matinn, svona eins og einu sinni í hverjum mánuði. Hann er hægt að matreiða á svo marga góða vegu að enginn ætti að fá leið á honum. Við mælum með þessari einföldu uppskrift:
Innihald:
4 laxabitar úr flaki, um 200 g hver
salt
malaður svartur pipar
2 msk extra-virgin ólívuolía
1 dl hvítvín
safi úr 1 og ½ sítrónu
2 hvítlauksrif sneidd
¼ tsk rauðar piparflögur
2 msk smjör
1 sítróna, sneidd
2 msk af fersku dilli, fint saxað
Aðferðin:
Hitið olíuna á góðri pönnu á meðalhita. Þegar olían er orðin heit, en ekki farin að brenna, leggið laxabitana á hana með roðið upp. Kryddið með salti og pipar. Steikið laxinn þar til hann er orðinn gullinn og snúið þá við.
Bætið víninu og safa úr 1 sítrónu, hvítlauk og rauðum pippar út á. Látið suðuna koma upp og ausið soðinu af og til yfir laxinn. Þegar laxinn er eldaður í gegn er hann tekinn af pönnunni. Bætið smjöri á pönnuna og því sem eftir er af sítrónusafanum og hrærið vel saman. Látið krauma þar til soðið hefur þykknað smávegis, eða í 2 mínútur.
Hellið sósunni yfir laxinn og berið fram með sítrónusneiðum, dilli og góðum soðnum kartöflum.