Leggja til 44 veiðidaga á grásleppunni

Grásleppuveiðar hófust á öllum svæðum 20. mars sl. nema í innanverðum Breiðafirði þar sem veiðin hefst að venju 20. maí.  Búið er að virkja 96 leyfi á móti 84 leyfum á sama tíma 2018. Aflabrögð hafa verið heldur slakari og nemur samdrátturinn um 30% í afla hvern veiðidag.

Hafrannsóknastofnun hefur lagt til að grásleppuafli fari ekki umfram 4.805 tonn, sem er um 14% minnkun milli ára.

Í dag fundaði grásleppunefnd LS um horfur á yfirstandandi vertíð og dagafjölda vertíðarinnar.  Á fundinum var ákveðið að leggja til við ráðuneytið að veiðidagarnir verði 44, sem er sami dagafjöldi og var á síðustu vertíð.  Til grundvallar niðurstöðu nefndarinnar eru aflatölur og þróun  síðustu vertíða skoðaðar í samhengi við upphaf yfirstandandi vertíðar og ráðgjöf Hafró með það að markmiði að veiðin verði sem næst ráðgjöf Hafrannsóknastofnunar.