Það gefur á bátinn

Veður eru rysjótt um þessar mundir. Þrálátar brælur hafa gert sjómönnum lífið leitt, en um það þýðir lítið að fást. Það verður að sækja fiskinn, því neytendur ytra vilja fisk á sinn disk og engar refjar. Þeir spyrja ekki um veðurfar við Íslandsstrendur.

Innsiglingin til Grindavíkur var á árum áður erfið og þurftu menn að þekkja vel til þegar komið var þangað inn í vondum veðrum. Nú eru aðstæður miklu betri en engu að síður lemur Ægir konungur hressilega á bátunum, þegar þeir koma inn í brælu. Þessa syrpu af myndum tók Jón Steinar Sæmundsson af línubátnum Valdimar GK, þegar hann var að koma inn um helgina. Ölduhæð var um 6,6 metrar og nokkuð hvasst.