Botnfiskurinn bætir upp loðnubrestinn

Aflaverðmæti úr sjó var 10,6 milljarðar í janúar sem er 10,2% aukning samanborið við janúar 2018. Verðmæti botnfiskaflans nam 9,6 milljörðum og jókst um 35,7%. Verðmæti þorskaflans nam 5,8 milljörðum og jókst um 990 milljónir eða 20,6% samanborið við janúar 2018. Mikil aukning var í verðmæti ýsuaflans sem nam ríflega 1,9 milljarði samanborið við 950 milljónir í janúar 2018. Verðmæti uppsjávarafla var einungis 55 milljónir samanborið 1,9 milljarða í janúar 2018. Munar þar að sjálfsögðu mest um loðnuafla. Verðmæti flatfiskafla var 855 milljónir, 49,5% meiri en í janúar 2018.
Þessi aukning verður þrátt fyrir mikinn aflasamdrátt í mánuðinum. Fiskafli íslenskra skipa í janúar var 46,6 þúsund tonn sem er 57% minni afli en í janúar 2018. Aflasamdráttur skýrist af samdrætti í loðnuafla en engin loðna veiddist í janúar samanborið við 68 þúsund tonn í janúar 2018. Botnfiskafli nam tæpum 43 þúsund tonnum í janúar og jókst um 17% miðað við sama mánuð 2018. Af botnfisktegundum var aflaaukningin mest í ufsa- og ýsuafla, en þorskafli jókst einnig um 5%.
Það er því veruleg aukning botnfiskaflans sem gerir mun betur en að vega upp á móti loðnubrestinum mælt í verðmætum.

Verðmæti afla sem seldur var til eigin vinnslu innanlands nam tæpum 5 milljörðum, sem er um 47% af heildarverðmæti. Verðmæti sjófrysts afla nam 3,2 milljörðum og verðmæti afla sem fór á fiskmarkaði til vinnslu innanlands var tæpir 1,9 milljarðar, eða um 18% af heildarverðmæti.

Á 12 mánaða tímabili, frá febrúar 2018 til janúar 2019, nam aflaverðmæti úr sjó rúmum 128 milljörðum króna sem er 9,1% aukning miðað við sama tímabil ári fyrr samkvæmt bráðabirgðatölum Hagstofunnar.

Hagtölur sem birtast í þessari fréttatilkynningu eru bráðabirgðatölur. Þær byggjast á gögnum um verðmæti fyrstu sölu landaðs afla sem Fiskistofa safnar saman.

Ljósmynd Hjörtur Gíslason.