Eins og skagfirsk sumarblíða

Drangey SK2 kom til hafnar í Grundarfirði um helgina með heildarafla um 222 tonn. Heimasíðan hafði samband við Andra Má Welding stýrimann.

„Við vorum á Selvogsbanka og á veiðum í fimm daga. Veiðarnar voru rólegar fyrstu þrjá sólarhringana á meðan við biðum eftir því að fiskurinn gengi út eftir hrygningu. Síðustu tvo sólarhringana var mok veiði. Veðrið var mjög gott og minnti á skagfirska sumarblíðu” sagði Andri Már í samtali við heimasíðu Fisk Seafood.

Sigurborg SH12 kom til hafnar í Grundarfirði með heildarafla um 74 tonn. Heimasíða Fisk Seafood hafði samband við Ómar Þorleifsson skipstjóra.

„Veiðiferðin stóð í rúma fjóra sólarhringa. Við byrjuðum vestur af Garðskaga og enduðum út af Breiðafirði. Veiðar gengu vel og það var góður afli við Garðskaga. Veðrið var gott allan tímann og kærkomið eftir erfiðan vetur,” sagði Ómar.