Börkur með mest af makríl

Senn líður að lokum makrílvertíðar. Aflinn nú er orðinn 127.000 tonn samkvæmt aflastöðulista Fiskistofu. Í fyrra varð aflinn 125.500 tonn, en það var lakasta makrílvertíðin allan þennan áratug. Kvótinn náðist ekki í fyrra og næst líklega ekki nú.

Það sem einkennir vertíðina nú er, að makríllinn gekk ekki nema í litlum mæli upp að landinu og vestur með því. Því varð ekkert úr makrílveiði smábáta á handfæri í sumar og stóru skipin hafa þurft að sækja hann austur í Síldarsmuguna. Þangað er langt að sækja og hafa útgerðir, eins og Síldarvinnslan, með fleiri en eitt skip, sameinast um að flytja aflann í land. Þannig hefur eitt skip tekið afla af allt að þremur skipum um borð og farið með fullfermi í land, en hin halda áfram veiðum. Það skip sem næst er því að fylla sig fær svo frá öðrum, sé þess þörf og heldur í land.

Nú eru fimm skip komin með meira en 8.000 tonn samkvæmt aflastöðulistanum. Þar trónir Börkur NK á toppnum með 9.700 tonn og næstur er Huginn VE með 9.400 tonn. Næstu skip eru Venus NS með 8.800 tonn, Margrét EA með 8.800 tonn og Beitir með 8.600 tonn.