Arctic Fish hyggst auka framleiðslu sína á norðanverðum Vestfjörðum

Umhverfismati vegna fyrirhugaðs sjóeldis vestfirska fiskeldisfyrirtækisins Arctic Fish í Ísafjarðardjúpi, upp að 10.100 tonnum að hámarkslífmassa, er nú lokið. Vinna við umhverfismatið og undirbúning eldisins hefur staðið yfir í tæpan áratug. Þá er að ljúka auglýsingatíma viðbótareldisleyfa til Arctic Fish upp í 10.000 tonna lífmassahámark í Dýrafirði. Ef útgáfa eldisleyfa gengur eftir þá er útlit fyrir umtalsverða framleiðsluaukningu í eldi fyrirtækisins á norðanverðum Vestfjörðum.

Mælibátur Sjótækni við umhverfismælingar í Ísafjarðardjúpi jan 2021.

Arctic Fish stundar þegar fiskeldi á nokkrum stöðum á Vestfjörðum og eru höfuðstöðvar fyrirtækisins staðsettar í Ísafjarðarbæ. Fyrirtækið hefur lagt megináherslu á umhverfisvænt fiskeldi og hefur byggt upp seiðaeldisstöð í Tálknafirði sem er hýst í stærstu byggingum Vestfjarða. Eldisstöðin byggir á fullkomnu vatnsendurnýtingakerfi og er sú eina sinnar tegundar í heiminum þar sem kerfið nýtir jarðvarma og græna raforku. Áframeldið í sjó fer fram á eldisstöðvum félagsins í Tálknafirði, Patreksfirði, Önundarfirði og Dýrafirði.

Í vikunni hlaut Arctic Fish lífræna vottun Evrópusambandsins sem kennd er við græna laufblaðið.  Vottunin verður viðbót við aðra framleiðslu félagsins sem framleidd er í samræmi við ASC umhverfisstaðalinn. Stefnt er að fyrstu uppskeru úr Ísafjarðardjúpi árið 2023 og á næstu vikum er von á fyrstu lífrænu hrognunum frá Benchmark Iceland (Stofnfiski) sem síðar verða að seiðum sem fara í útsetningu sumarið 2022 og verða hluti af uppskerunni á þessum nýju svæðum.

Stein Ove Tveiten, forstjóri Arctic Fish: „Þetta er stór áfangi fyrir Arctic Fish. Höfuðstöðvarnar eru hér á Ísafirði og því er ánægjulegt fyrir okkur að nú lítur út fyrir að við getum hafið eldisstarfsemi hér í Djúpinu. Vestfirðingar hafa lagt áherslu á umhverfisvæna matvælaframleiðslu og þessi ræktun verður það. Um leið hefur velgengni fiskeldisins hér orðið til þess að nýta aldagamla reynslu heimamanna af sjávarútvegi og tryggt að sú matvælaframleiðsla haldi áfram.“