Íslensk straumbauja fannst við Færeyjar

Fyrir nokkru síðan urðu fiskeldismenn hjá Bakkafrosti varir við bauju sem rekið hafði inn á Haraldssund í Færeyjum.  Þegar nánar var skoðað kom í ljós að þetta var íslensk straumbauja sem hafði verið sett út norðan víð Ísland 2017.

Baujan var tekin í land og haft var samband við hafrannsóknastofnun Færeyja, sem ekki kannaðist við krógann. Veiðarfæragerðin Vónin fluttu baujuna til Þórshafnar, en hvorki nafn né heimilisfang fannst á henni. Nánari rannsóknir leiddu svo til þess að Hafrannsóknastofnun á Íslandi átti baujuna.

Baujan var sett út norðarlega á Hornbanka í ágúst 2017 til straummælinga og átti að sækja hana um sumarið 2018. Þá náðist ekkert samband við hana og því fannst hún ekki eins og til stóð. Í baujunni var staðsetningarbúnaður til sendingar um gervihnött til að gefa upp hnattstöðu svo boð kæmu um að hún væri ekki á réttum stað. Einhverra hluta vegna virkaði búnaðurinn ekki, en baujan hafði slitnað frá umfangsmeiri búnaði sem hún var tengd við.

Markmiðið við að leggja baujuna út á Hornbanka ásamt þremur öðrum baujum, var að mæla streymi Golfstraumsins úr Atlantshafi norður fyrir Ísland og yfir í Norðurhöf. Golfstraumurinn hefur mikla þýðingu fyrir vistkerfið og veðurlag á norðanverðu Íslandi. Straumurinn fer einnig norður um Færeyjar í gegnum Hjaltlandsrennuna. Hafrannsóknastofnum Færeyja hefur mælt strauminn við Færeyjar síðan 1997 og er í samstarfi við Hafrannsóknastofnunina í Aberdeen í Skotlandi.