Grindvísk gæðaýsa

Jæja, nú eru sjómenn að kvarta yfir því að alltof mikið veiðist af ýsu. Þeir hafi ekki nægar veiðiheimildir fyrir henni. Við neytendur höfum nokkra samúð með þeim, en fögnum miklu framboði á þessum einstaka gæðafiski. Þess vegna bjóðum við nú upp á uppskrift að grindvískri gæðaýsu með karrý, grænmeti og hrísgrjónum. Einfaldur og hollur réttur.

Innihald:

800g fersk gæðaýsa, roðflett og beinhreinsuð, í fjórum eða átta jafnstórum bitum
3 miðlungs gulrætur, sneiddar í þunnar sneiðar
1 blaðlaukur, þverskorinn
4 vorlaukar, þverskornir
olía til steikingar
sítrónupipar
sellerísalt
karrý, magn eftir smekk
½ teningur grænmetiskraftur
4 msk. hveiti
1 pakki af karrýsósu
1 dl. rjómi

Aðferð:

Hitið matarolíu á góðri pönnu og látið grænmetið mýkjast í henni. Kryddið lítillega með sellerísalti og karrý. Takið þá grænmetið af pönnunni. Blandið saman hveiti og karrýdufti og veltið fiskbitunum upp úr blöndunni og steikið á góðum hita á sömu pönnu og grænmetið. Þegar bitarnir eru orðnir gullnir er þeim snúið við og og hitinn lækkaður lítillega. Þá er grænmetið sett út á pönnuna og látið hitna á ný með fiskinum.
Sósan:

Við notum pakka af karrýsósu frá Toro. Setjið minna af vatni en segir til um og notið rjóma í staðinn til að mýkja sósuna. Bætið grænmetiskrafti og karrý út í eftir smekk.
Grjónin:

Hægt er að nota fjölmargar gerðir af grjónum; til að hita í örbylgjuofni, sjóða í poka eða sjóða á gamla góða mátann. Ef síðastnefnda leiðin er farin er best að skola grjónin vel og setja í pott með hæfilega miklu af köldu vatni. Stilla á góðan hita og þegar suðan er komin upp, er slökkt á hitanum og potturinn látinn standa á hellunni. Þannig verða grjónin hæfilega soðin eftir 10 til 15 mínútur.

Berið fiskinn fram í pönnunni, grjónin í skál og sósuna í fallegum potti eða skál. Njótið matarins með kældu hvítvíni, ef það hentar.