Mikið um hafís á svæðinu

Málmey SK1 kom til hafnar á Sauðárkróki í gær. Heildarmagn afla um borð var um 148 tonn og uppistaða aflans var þorskur. Heimasíða Fisk Seafood hafði samband við Þórarinn Hlöðversson skipstjóra og spurði út í túrinn.

„Við vorum fimm og hálfan sólarhring á veiðum og vorum á Þverálshorni, Þverál og Kögurgrunni. Veiðarnar voru þokkalegar á daginn, en sáralitlar á nóttunni. Það var mikið um ís á svæðinu, við hröktumst undan honum fram og til baka eftir vindátt og straum. Veðrið var ágætt á köflum,“ sagði Þórarinn.