Meira af þorski og ýsu á Færeyjabanka
Þriðja árið í röð sýna niðurstöður „togararalls“ Færeyinga að vaxandi þorskgengd er á Færeyjabanka. Mun meira er um þorskinn á bankanum er á tímabilinu 2006 til 2019. Þorskurinn sem fékkst nú var stór hrygningarfiskur, vel á sig kominn.
Samkvæmt færeysku hafrannsóknastofnuninni er þó rétt að hafa í huga að í leiðangri á haustdögum síðasta árs hafi lítið fengist af þorski á Færeyjabanka. Því sé óljóst hve mikið sé af þeim gula á bankanum í raun. Hins vegar sé alveg ljóst að mikið sé af ýsu á bankanum. Mikið af ýsu fékkst í leiðangrinum nú í vetrarlok, bæði stórri og smárri. Þá var mikið af ufsa á slóðinni, mun meira en áður og var ufsinn stór og vel á sig kominn.
Vegna veðurs var leiðangurinn nú styttur og aðeins tekinn grynnri hluti bankans. Venjulega eru tekin 29 hol í leiðangrinum, en nú voru þau aðeins 17. Skráðar voru 17 fiskitegundir og tvær tegundir smokkfisks. Sandsíli var ánetjað á flestum togstöðvum og sýndi magainnihald botnfiska að þeir væru að éta mikið af sílinu. Sjávarhiti við botn var um átta gráður.