Sjávarútvegssýningin í Kópavogi hafin

Deila:

Íslenska sjávarútvegssýningin í Kópavogi var opnuð í gær. Henni hafði áður verið frestað tvívegis vegna faraldursins af völdum Covid-19. Vegna þeirra aðstæðna meðal annars er sýningin smærri í sniðum en undanfarnar sýningar.

Marianne Rasmussen-Coulling, framkvæmdastjóri sýningarinnar, kynnti sýninguna í ávarpi við opnunarathöfn sýningarinnar og benti á hið erfiða umhverfi sem ríkt hefur í meira en tvö ár. Benedikt Árnason, ráðuneytisstjóri, opnaði sýninguna og lögðu þau bæði áherslu á sérstöðu Íslands í fararbroddi í heiminum í fiskveiðum og vinnslu fiskafurða.

Hlutfall erlendra sýnenda er fremur hátt að þessu sinni og eru nokkrar þjóðir með sérstaka þjóðarbása. Áberandi er fjöldi skipasmíðastöðva, sem tekur þátt í sýningunni nú. Að vanda er um fjölbreytta sýningu að ræða, þar sem það nýjasta í búnaði til veiða og vinnslu er kynnt. Í tengslum við sýninguna eru veitt verðlaun fyrir framúrskarandi frammistöðu í íslenskum sjávarútvegi.

Bræðurnir Örn og Óli Björn Þorbjörnssynir frá Hornafirði eru í bræðraferð á sýningunni og rákust þar á gamlan kunningja, Leó Óskarsson frá Vestmannaeyjum.
Óskar Veigu Óskarsson er einn frumherjanna í tæknivæðingu íslenskrar fiskvinnslu. Hann vinnur nú hjá vélaframleiðandanum Curio, sem sýnir meðal annars flökunarvél og hausara.
Deila: