Koma í land eftir langan feril

Deila:

Skipsfélagarnir Kristján Karlsson vélstjóri og Halldór L. Sigurðsson netamaður stíga nú í land af frystitogaranum Júlíusi Geirmundssyni ÍS 270 eftir áratuga störf um borð.

Kristján hóf störf sem vélstjóri á skipinu 13. nóvember 1989 þegar það kom nýsmíðað til landsins og hefur því starfað þar um 33 ára skeið. Sjómennsku hefur hann stundað í 52 ár því áður var hann m.a. á Sigurey, Guðmundi í Tungu og Selá.

Halldór hefur undanfarin 17 ár verið netamaður á Júlíusi, en sjómennskan spannar 42 ár því áður var hann m.a. á Hrafni, Sléttanesi og Framnesi.

„Við þökkum þessum frábæru starfsmönnum fyrir vel unnin störf undanfarna áratugi og óskum þeim alls hins besta í framtíðinni,“ segir í frétt á heimasíðu HG.

Á myndinni eru Njáll Flóki Gíslason, skipstjóri, Halldórs L. Sigurðsson, netamaður, Kristján Karlsson, vélstjóri og Einar Valur Kristjánsson framkvæmdastjóri Hraðfrystihúss Gunnvarar.

Deila: