Féll fyrir borð af Sighvati GK
Sjómaðurinn, sem leitað hefur verið að á Faxaflóa féll útbyrðis af línuskipinu Sighvati GK í Grindavík.
Þetta kemur fram í tilkynningu frá Vísi hf., sem gerir skipið út.
„Skip og þyrlur Landhelgisgæslunnar, skip Slysavarnafélagsins Landsbjargar, auk skipa á vegum margra útgerða hafa tekið þátt í leitinni að hinum týnda sjómanni og er öllum viðkomandi aðilum færðar dýpstu þakkir.
Vísir hf. óskar eindregið eftir því að friðhelgi fjölskyldu sjómannsins, áhafnar og aðstandenda verði virt á þessum erfiðu tímum,“ segir í tilkynningunni.
Í gærkvöldi var haldin fjölmenn bænamessa í Grindavíkurkirkju og meðal viðstaddra voru helstu stjórnendur Vísis. Maðurinn, sem saknað er, á konu og þrjú börn.