Lög um grásleppukvóta í bígerð

Í samráðsgátt stjórnvalda eru nú til kynningar áform matvælaráðherra um kvótasetningu grásleppu sem undanfari þess að málið verði lagt fyrir Alþingi í febrúarmánuði. Þar segir að aflahlutdeild einstakra skipa skuli ákveðin með tilliti til aflareynslu sem fengin hafi verið á grundvelli leyfis sem skráð er á viðkomandi skip á tilteknu tímabili.

Svæðisskiptar heimildir – kvótaframsal milli svæða óheimilt
Áformað er að samanlögð aflahlutdeild fiskiskipa í eigu einstakra aðila, einstaklinga eða lögaðila, eða í eigu tengdra aðila, nemi aldrei hærra hlutfalli af heildaflahlutdeild í grásleppu en 2%.

Lagt er til að aflahlutdeildir í grásleppu verði svæðisskipt og að framsal aflaheimilda verði eingöngu heimilt innan tiltekinna svæða. Framsal milli svæða verði óheimilt og þannig verði tryggt að aflaheimildir hverfi ekki af tilteknum svæðum en veiti samt möguleika til hagkvæmari veiða innan svæðanna, líkt

Nýliðunaraflamark til nokkurra ára
„Einnig er lagður til að sérstakur nýliðunarpottur fyrir grásleppu sem verði settur á í gegnum 5,3% kerfið og Fiskistofu falið að halda utan um úthlutun þess til nýliða. Bent hefur verið á að ekki hefur verið mikil nýliðun í grásleppuveiðum síðast liðin 10 ár þrátt fyrir að kostnaður við að hefja veiðar sé ekki hár. Ef að hlutdeildarsetning leiðir til aukinnar hagkvæmni í greininni er hugsanlegt að verðmæti aflaheimilda muni aukast og því verði kostnaðarsamara að hefja grásleppuveiðar verði frumvarpið að lögum. Lagt er til að úthlutun nýliðunaraflamarks í grásleppu yrði til nokkurra ára og að þeim tíma liðnum hafi viðkomandi sjómanni tekist að kaupa sér varanlegar aflaheimildir. Nýliðunaraflamark í grásleppu verði gjaldfrjálst að undanskildu greiðslu veiðigjaldi og þjónustugjalda. Lagt er til að ráðherra verði veitt heimild til setningar reglugerðar um nýliðunaraflamark, þar sem komi fram hverjir geti sótt um nýliðunaraflamark, á hvaða tímamarki, hámarksaflamark fyrir nýliða og hvernig ráðstafa skuli því nýliðunaraflamarki sem ekki er sótt um. Þá er einnig lagt til að ráðherra verði heimilt að mæla fyrir um m.a. veiðitímabil, meðafla, umgengni við auðlindina og veiðarfæri í reglugerð,“ segir í kynningu um áform matvælaráðuneytisins.

Lagt fyrir Alþingi í febrúar
Fram kemur að málið sé áþingmálaskrá og sé að hluta sambærilegt máli sem flutt var á 151. þingi. „Áætlað er að frumvarpið verði lagt fram á Alþingi í febrúar 2023. Þar sem veiðitímabil grásleppu hefst í mars 2023 er lagt til að gildistaka frumvarpsins, verði það að lögum, muni miðast við veiðitímabil grásleppu vorið 2024, þá gefst svigrúm til að undirbúa hlutdeildarsetninguna, setja reglugerð um nýliðunarpott og innleiða breytingarnar með góðum fyrirvara fyrir handhafa grásleppuveiðileyfa og Fiskistofu.