Hrósa skipverjum og Landhelgisgæslunni

„Skipverjar og Landhelgisgæslan eiga hrós skilið fyrir að brugðist hratt og vel við, og enn á ný sannast það hversu mikilvægt það er okkur Íslendingum að eiga öfluga Landhelgisgæslu sem er vel tækjum búin,“ segir í frétt á Facebook síðu Þorbjarnar í Grindavík, útgerðar frystiskipsins Hrafns Sveinbjarnarsonar GK sem varð vélarvana á miðunum úti fyrir Vestfjörðum um helgina. Líkt og sagt hefur verið frá kom varðskipið Freyja skipinu til aðstoðar og tók það í tog. Var ætlunin að draga Hrafn til Ísafjarðar en skipverjum tókst með aðstoð Gæslnnar síðan að koma aðal- og ljósavélum skipsins í gang á ný og gat skipið þá siglt fyrir eigin vélarafli til Hafnarfjarðar. Þar var nýtt troll tekið um borð í gærkvöldi og snemma í morgun var togarinn kominn á ný á miðin úti fyrir Vestfjörðum þar sem ætlunin var að slæða trollið upp sem skera þurfti aftan úr togaranum þegar vélarbilunin varð. Ástæða þess að drapst á vélunum var að kælihosa fór í sundur og vatn skvettist yfir vélarrúmið.