70% færri landselir en árið 1980

Deila:

„Staða stofnsins er viðkvæm og ýmsir þættir sem þar hafa áhrif, s.s. meðaflaveiðar, viðvera og ágangur manna, umhverfisþættir, mengun, loftslagsbreytingar og sveiflur í fæðutegundum sela. Niðurstöður talninganna undirstrika mikilvægi áframhaldandi talninga og að sinna rannsóknum sem kunna að hafa áhrif á þróun stofnsins,“ segir í nýri vísindagrein um sveiflur í stofnstærð landsels yfir 40 ára tímabil. Höfundur greinarinnar er Sandra Granquist, sjávarspendýrasérfræðingur hjá Hafrannsóknastofnun og deildarstjóri selarannsóknadeildar hjá Selasetri Íslands.

Í frétt Hafrannsóknastofnunar segir að reglulegar stofnmælingar landsels séu nauðsynlegar til að fylgjast með sveiflum í stofnstærð og fyrir stjórnun stofna. Í greininni er fjallað um framkvæmd stofnmælinga á íslenska landselastofninum, stöðu stofnsins í dag ásamt þróun hans yfir 40 ára tímabil. Alls voru framkvæmdar 13 talningar úr lofti yfir selalátur (júlí-ágúst) á árunum 1980 til 2020. Fjöldi landsela við Ísland samkvæmt nýjastu talningu frá 2020 er um 10.319 dýr. Það er um 69% færri en þegar eftirlit með stofninum hófst árið 1980, en þá var fjöldinn 33.327 selir.

Fram kemur í umfjölluninni að talningar bendi til að mesta fækkunin hafi átt sér stað á fyrsta áratug mælinganna, þegar stofninn drógst saman um 50% og er orsökin talin vera veiðar. Síðan þá hafi fækkun í selastofninum verið hægari og fjöldinn sveiflast lítillega.

„Staða stofnsins er viðkvæm og ýmsir þættir sem þar hafa áhrif, s.s. meðaflaveiðar, viðvera og ágangur manna, umhverfisþættir, mengun, loftslagsbreytingar og sveiflur í fæðutegundum sela. Niðurstöður talninganna undirstrika mikilvægi áframhaldandi talninga og að sinna rannsóknum sem kunna að hafa áhrif á þróun stofnsins.“

Deila: