Úthlutun aflaheimilda í grásleppu
Fimm bátar fá áætlað meira en 10 tonn af grásleppu í úthlutun Fiskistofu á aflaheimildum. Mest fær Rán SH frá Arnarstapa, eða 14.876 kg. Það gerir 1,29% af hlutdeild í grásleppukvóta. Þetta kemur fram á gagnasíðum Fiskistofu. Sigurey ST 22 frá Drangsnesi fær 13,276 tonn en Hlökk ST 66 frá Hólmavík 12,266 tonn.
Úthlutunin byggir á veiðireynslu. Eigendur og útgerðaraðilar geta komið athugasemdum á framfæri um útreikning á veiðireynslu fyrir 19. nóvember næstkomandi. Áætlun hlutdeildarinnar byggir á bráðabirgðaákvæði laga um breytingu á lögum um veiðar í fiskveiðilandhelgi Íslands og lögum um stjórn fiskveiða (veiðistjórn grásleppu).
Við útreikning áætlunarinnar er stuðst við:
-
Veiðireynslu réttinda sem skráð eru á viðkomandi skip með grásleppuréttindi og leyfi.
-
Landanir grásleppu frá og með árinu 2018 til og með ársins 2022 að undanskildu árinu 2020, á þeim tíma sem leyfi til grásleppuveiða var í gildi plús einn dagur.
-
Heildar veiði í fiskveiðlandhelgi Íslands en ekki niður á svæði.
-
Leyfilegan heildarafla í grásleppu samkvæmt reglugerð um veiðar í atvinnuskyni fiskveiðiárið 2024/2025 og almanaksárið 2025.
Athugið:
-
Eftir 19. nóvember næstkomandi eru hlutdeildir endurreiknaðar ef þörf krefur og úthlutun framkvæmd.
-
Úthlutun skal framkvæmd fyrir 1. mars 2025.
-
Framsal aflahlutdeilda er óheimilt til 31. ágúst 2026.
-
Aðilar sem eiga grásleppuréttindi með veiðireynslu en ekki eru skráð á bát hafa fengið sent bréf í pósthólf útgerðaraðila á Ísland.is