Spyr hvort þorskstofninn hafi hrunið
Arthúr Bogason, formaður stjórnar Landssambands smábátaeigenda spyr í grein á vef sambandsins hvort þorskstofninn sé hruninn. Í grein sinni segist hann telja að aðferðafræði og stofnstærðarmælingar Hafró séu stórkostlega á skjö-n við raunveruleikann, þ.e. upplifun sjómanna við sín daglegu störf á miðunum.
Hann birtir í greininni þorskveiði við Íslands á árunum 1944 til 2023, eða í 80 ár. Fyrstu 40 árin eru fyrir kvótakerfið en seinni 40 árin eru eftir að það var tekið upp.
„Sú mynd sem fiskifræðingar drógu upp, fyrst árið 1972 í skýrslu Hafrannsóknastofnunar til Landhelgisnefndar og a.m.k. þar til í skýrslu Hafró 1983, (ég hef hreinlega ekki nennt að lesa lengra í skýrslufarganinu) var að afrakstursgeta þorskstofnsins væri á bilinu 450 – 500 þúsund tonn. Þessi niðurstaða tveggja fyrrverandi forstjóra Hafrannsóknastofnunar (Jóns Jónssonar og Jakobs Jakobssonar) getur ekki hafa byggst á öðru en aflagögnum – og heilbrigðri skynsemi,” skrifar stjórnarformaðurinn og heldur áfram.
„Lýsingar þeirra á fiskveiðunum var að um algert stjórnleysi væri að ræða. Mér finnst því rökrétt af þeirra hálfu að hafa ályktað sem svo að fyrst þorskstofninn þyldi þessa miklu veiði áratugum saman í stjórnleysi, væri hægðarleikur að hann bæri 450 – 500 þúsund tonna veiði undir vökulum augum Hafrannsóknastofnunar.
Svo rann upp árið 1981. Það ár öfluðu Íslendingar (einir og sér – útlendingar farnir af miðunum) meira af þorski en nokkurntíma í veiðisögu þjóðarinnar frá landnámi, rúmlega 488 þúsund tonna. Þetta var niðurstaðan eftir 38 ára “gegndarlausa ofveiði”.”
