Fjarðabyggð segir óvissu í sjávarútvegi

Bæjarráð Fjarðabyggðar lagði á fundi sínum í gær fram bókun vegna óvissu í sjávarútvegi. Ráðið lýsir yfir þungum áhyggjum vegna boðaðra hækkana á veiðigjöldum, einkum á uppsjávarveiðar. Þá lýsir ráðið yfir áhyggjum af þeim áhrifum sem boðuð aukning á veiðiheimildum til strandveiða muni hafa á aðra kvóta. Bent er á að Fjarðabyggð byggi að stórum hluta á sjávarútvegi og óvíða komi meiri afli á land en þar. Velgengni greinarinnar sé undirstaða efnahagslegrar og félagslegrar stöðu samfélagsins.

Ráðið skorar á stjórnvöld að hefja samtal við útgerðir, sveitarfélög og hagsmunaðila sem byggja á sjávarútvegi til að eyða þessari óvissu og kynna áform sín á málefnalegan og skýran hátt. Loks er skorað á stjórnovöld að framkvæma greiningu á áhrifum boðaðra breytinga á rekstur fyrirtækja og samfélög sem byggi afkomu sína á sjávarútvegi.

—

Bókun bæjarráðs Fjarðabyggðar vegna óvissu í sjávarútvegi

Bæjarráð Fjarðabyggðar lýsir yfir þungum áhyggjum vegna óvissu sem nú ríkir í sjávarútvegi í kjölfar boðaðra hækkana á veiðigjöldum, einkum á uppsjávarveiðar, ásamt þeim áhrifum sem boðuð aukning á kvóta til strandveiða kemur til með að hafa á aðra kvóta. Fjarðabyggð er sveitarfélag sem byggir að stórum hluta á sjávarútvegi og óvíða kemur meiri afli á land en þar og velgengni greinarinnar er undirstaða efnahagslegrar og félagslegrar stöðu samfélagsins.

Áhrifin á sjávarútveginn og sveitarfélagið:
– Hækkun veiðigjalda mun auka kostnað útgerða á Austfjörðum ofan á umtalsverðar hækkanir sem urðu um áramótin og veikja þannig fjárhagslega getu þeirra.
– Hækkanir á veiðigjöldum koma ofan á óstöðugleika sem þegar hefur ríkt í greininni, m.a. vegna loðnubrests, skerðinga á raforku og óvissu um markaðsaðstæður.
– Fyrirséð er að slíkar hækkanir muni bitna á fjárfestingum fyrirtækja, draga úr afkomu þeirra og veikja samkeppnisstöðu þeirra á alþjóðamörkuðum. Þessar aðstæður hafa einnig afleidd áhrif á atvinnustig og tekjur samfélagsins sem þegar hafa dregist saman verulega vegna loðnubrests á liðnu ári. Hefur það haft veruleg áhrif á tekjur sveitarfélagsins Fjarðabyggðar eins og víðar um land.

Áskorun til stjórnvalda: Bæjarráð Fjarðabyggðar hvetur stjórnvöld til að grípa til eftirfarandi aðgerða:
1. Samráð við hagsmunaaðila: Stjórnvöld þurfa að hefja samtal við útgerðir, sveitarfélög og aðra hagsmunaaðila sem byggja á sjávarútvegi til að eyða óvissu og kynna áform sín á málefnalegan og skýran hátt.
2. Heildrænt mat á áhrifum: Mikilvægt er að framkvæma greiningu á áhrifum boðaðra breytinga á rekstur fyrirtækja og samfélög sem byggja afkomu sína á sjávarútvegi.

Með þessu móti má tryggja að ákvarðanir um sjávarútveg styðji við sjálfbæra nýtingu auðlinda, efnahagslegan stöðugleika og byggðaþróun í samfélögum eins og Fjarðabyggð.

Bæjarráð Fjarðabyggðar leggur því ríka áherslu á nauðsyn þess að stjórnvöld bregðist við með ábyrgum hætti og hefji samtalið. Íslenskur sjávarútvegur er enn ein af grunnstoðum samfélagsins hér á landi og að henni þarf að hlúa en ekki veikja.