Metár hjá Hampiðjunni í endurvinnslu veiðarfæra

Árið 2024 varð metár í söfnun og endurvinnslu notaðra veiðarfæra hjá Hampiðjunni á Íslandi. Aldrei áður hefur fyrirtækið sent jafn mikið magn til endurvinnslu, en alls voru um 1.294 tonn endurunnin á árinu. Þetta er veruleg aukning frá árinu 2021, þegar magnið nam um 500 tonnum, og hefur það aukist jafnt og þétt síðustu ár.

Hampiðjan hefur um langt skeið tekið við notuðum veiðarfærum frá viðskiptavinum sínum, flokkað þau og sent til endurvinnslu, aðallega til Danmerkur og Litháen. Þar eru efnin möluð, þvegin og brædd til að búa til plastkorn sem nýtt eru í framleiðslu nýrra vara. Helstu samstarfsaðilar í þessari vinnslu eru Plastix í Danmörku og Polivektris í Litháen, auk norska fyrirtækisins Nofir sem sérhæfir sig í endurvinnslu veiðarfæra.

Við netagerð og viðgerðir á veiðarfærum fellur einnig til töluvert magn af efni sem Hampiðjan flokkar sérstaklega. Hreint pólýetýlen (PE), einkum úr trollnetum, er sent til Hampidjan Baltic í Litháen. Þar er það malað, brætt og breytt í ný plastkorn sem eru síðan blönduð við nýtt efni í allt að 10% hlutfalli.

Nánari greining sýnir að stærsti hluti endurunninna efna var nylon, alls um 379 tonn. Þá voru um 250 tonn af svonefndu rockhopper-gúmmíi og rúmlega 146 tonn af pólýetýleni. Einnig voru 159 tonn af málmum endurunnin og 103 tonn af flottrollsköðlum. Minna magn safnaðist af öðrum efnum. Óendurvinnanlegt efni nam 170 tonnum, eða einungis um 13% af heildarmagninu.

Hampiðjan vinnur jafnframt að því að leita lausna fyrir efni sem ekki er unnt að endurvinna með hefðbundnum aðferðum, svo sem kaðla úr blönduðum efnum, sem í dag nýtast einungis til orkuendurvinnslu. Fyrirtækið leggur áherslu á sjálfbærni í starfsemi sinni með endurvinnslu og endurnýtingu efna.