Yfirlýsing frá stjórn Drangeyjar

Stjórn Drangeyjar – smábátafélags Skagafjarðar – hefur í yfirlýsingu brugðist við skrifum og yfirlýsingum forstjóra FISK Seafood ehf. um dragnótarveiðar í firðinum í sumar.

Í yfirlýsingunni segist smábátafélagið ánægt með þá fádæma ýsugengd sem verið hefur á Skagafirði og nærliggjandi miðum á þessu ári og telur jákvætt að stofninn sé vel nýttur og aflinn landað sem mest á Sauðárkróki. Hins vegar snúist gagnrýni félagsmanna ekki um sjálfar veiðarnar heldur staðsetningu þeirra.

Félagið bendir á að dragnótarveiðar hafi verið stundaðar upp í fjörum utan ósa Héraðsvatna, á vel þekktum hrygningarsvæðum þorsks, auk þess að hafa farið fram á fáum þorskveiðistöðum færanbáta innan eyja. Á þessum stöðum hafi áður ekki verið hægt að stunda dragnótarveiðar.

Drangey segist styðja allar rannsóknir á fiskistofnum og lífríki fjarðarins og tekur undir ályktun sveitarstjórnar Skagafjarðar um málið. Félagið bendir á að rannsókn Hafrannsóknastofnunar frá 2008, þar sem fjögur tog voru tekin með lítilli tveggja­byrða flatfiskadragnót, geti ekki talist fullnægjandi grundvöllur fyrir þeirri ályktun að núverandi stór drag­nót skipa hafi engin áhrif á lífríkið.

Minnt er á að Hafrannsóknastofnun hafi árið 1972 lagt til að allar togveiðar með botntroll og dragnót yrðu bannaðar innan 12 mílna landhelginnar við allt Norðurland.

Yfirlýsingin í heild:

Að gefnu til­efni og með vís­an til skrifa og yf­ir­lýs­inga for­stjóra FISK Sea­food ehf. um drag­nót­ar­veiðar vill stjórn Drang­eyj­ar – smá­báta­fé­lags Skaga­fjarðar taka eft­ir­far­andi fram:

1. Fé­lag­ar í Drang­ey fagna að sjálf­sögðu þeirri fá­dæma ýsu­gengd sem verið hef­ur á Skagaf­irði og nær­liggj­andi miðum á þessu ári og tel­ur afar já­kvætt að þessi stofn sé vel nýtt­ur og afla úr firðinum landað sem mest á Sauðár­króki.

2. Gagn­rýni fé­lags­manna á þær drag­nót­ar­veiðar sem hafa verið stundaðar á firðinum í sum­ar snýst ein­göngu um hvar þess­ar veiðar hafa farið fram. Ann­ars veg­ar upp í fjör­um utan ósa Héraðsvatna á mjög vel þekkt­um hrygn­ing­ar­svæðum þorsks og hins veg­ar á þeim til­tölu­lega fáu þorskveiðistöðum færa­báta sem er að finna inn­an eyja og ekki var hægt að veiða með drag­nót á fyrr á árum.

3. Fé­lagið styður all­ar rann­sókn­ir sem gerðar eru á fiski­stofn­um og öðru líf­ríki á firðinum og tek­ur því und­ir álykt­un sveit­ar­stjórn­ar Skaga­fjarðar um þess­ar veiðar. Rann­sókn Haf­rann­sókna­stofn­un­ar frá því í októ­ber 2008 þar sem fjög­ur tog voru tek­in út af Fagra­nesi með til­tölu­lega lít­illi tveggja­byrða flat­fiska­drag­nót er að áliti fé­lags­ins vart þess eðlis að draga megi þá álykt­un af, að veiðar með þeim risa­drag­nót­um sem nú eru notaðar á stærri skip­um hafi eng­in áhrif á líf­ríki fjarðar­ins. Því skuli slík­ar veiðar heim­il­ar án svæðistak­mark­ana á öll­um firðinum. Minna má á að þessi sama stofn­un lagði til árið 1972 að all­ar tog­veiðar með botntroll og drag­nót yrðu bannaðar inn­an 12 mílna land­helg­inn­ar fyr­ir öllu Norður­landi.

Skagaf­irði 10. ág­úst 2025

Magnús Jóns­son formaður Drang­eyj­ar – smá­báta­fé­lags Skaga­fjarðar