Rannsókn á áhrifum þangtekju í Breiðafirði
Klóþang hefur verið nýtt í Breiðafirði í rúm 50 ár, en áhrif sláttarins á lífríki fjörunnar eru lítt þekkt. Ný rannsókn Hafrannsóknastofnunar, í samstarfi við Háskóla Íslands og Sjávarlíffræðistofnunina í Plymouth, varpar nú ljósi á þessi áhrif.
Í rannsókninni voru lögð fjölmöskva net í skjólsælum fjörum í Breiðafirði til að fylgjast með árstíðabundnum breytingum á fiskum. Bornar voru saman fjörur þar sem klóþang hafði nýlega verið slegið og ósnert svæði. Alls veiddust níu fisktegundir, þar á meðal ufsi, þorskur og marhnútur.
Niðurstöðurnar sýna að fjörur gegna mikilvægu hlutverki sem uppeldisstöðvar fyrir ungan ufsa og þorsk yfir sumarið. Þó að heildaráhrif þangtekju reyndust lítil, var þorskur marktækt stærri á ósnertum svæðum. Á hinn bóginn virtust fiskar á slegnum svæðum hafa fjölbreyttara fæðuval, sem bendir til að grisjun þangs geti aukið aðgengi að fæðu.
Rannsóknin undirstrikar mikilvægi klóþangs sem búsvæðis fyrir sjávarlíf og að beita þurfi varúðarnálgun við nýtingu þess, sérstaklega í ljósi hlutverks þess sem uppeldisstöð og fæðuuppspretta fyrir mikilvægar fisktegundir.
