Engin lausn að veiða bara meira
„Því miður er lækkun í veiðiráðgjöf í þorskinum, sem er okkar mikilvægasti nytjastofn. Á sama tíma erum við að horfa upp á að stofninn er sterkur. Við búum svo vel að vera með þann stofn í Atlantshafinu sem er í hvað besta ástandinu. Og nýtingin á honum er í samræmi við alþjóðasamninga um sjálfbærni og nýtingarstefnu stjórnvalda ,“ segir Þorsteinn Sigurðsson, forstjóri Hafrannsóknastofnunar í viðtali við nýtt tölublað Ægis.
Þorsteinn segir í viðtalinu mikilvægt að mála ekki upp of dökka mynd. „Við megum ekki bara tala okkur niður og láta eins og allt sé í skrúfunni. Framleiðslan af ungviði þorsks er ekki í samræmi við það sem við vonuðumst eftir. Við erum að fá inn lítinn árgang og þá skilar það sér í ráðgjöfina með þessum hætti – þetta fer upp eða niður um einhver þúsund tonn.“
Sú aðferðafræði sem notuð er til grundvallar veiðiráðgjöf í þorski hefur oft verið gagnrýnd. Sitt sýnist hverjum. Í ágústmánuði sagði Sigurjón Þórðarson, formaður atvinnuveganefndar og þingmaður Flokks fólksins, til dæmis að taka þurfi ráðgjöfina til endurskoðunar. Þessi gagnrýni er ekki ný af nálinni.
Þorsteinn segir að gagnrýnin hafi undanfarin ár snúist um tvennt. Annars vegar að stofnunin hafi fyrir hálfri öld eða svo lofað 500 þúsund tonna ráðgjöf í þorski, ef farið yrði að því módeli sem notað hefur verið. Það sé af og frá. „Það er búið að endurtaka þetta svo oft að fólk er farið að trúa þessu. Við höfum alltaf sagt í aflaregluskýrslum að miðað við tiltekna framleiðslugetu geti afraksturinn orðið tiltekið mörg tonn. Þetta hefur alltaf verið með fyrirvara um breytingar í umhverfinu, sem við höfum svo sannarlega séð, því miður,“ segir Þorsteinn og nefnir þær breytingar í hafinu sem orðið hafa vegna hnattrænnar hlýnunar. „Það að fullyrða aftur og aftur að við höfum lofað einhverju, það er ekki sannleikanum samkvæmt.“
Á hinn bóginn hefur ítrekað verið lagt til að leiðin til að stækka stofninn sé að veiða meira. Þorsteinn bendir á að á þeim svæðum þar sem veitt hafi verið umfram ráðgjöf eða sjálfbæra nýtingu í Atlantshafi, þar hafi illa farið. „Þeir stofnar eru í mjög slæmu ástandi, þar sem þetta hefur verið reynt. Það að veiða meira er ekki lausnin. Það er búið að prófa þetta,“ segir hann og nefnir tilraun sem gerð var í Færeyjum sem dæmi.
