Stjórnvöld verði að forðast að skapa óvissu

Myndin af Jóni er fengin af vef Samherja. Hana tók Birgir Ísleifur Gunnarsson.

Samherji hf. hefur eflst verulega á undanförnum árum og stendur í dag sterkt að vígi, að mati Jóns Sigurðssonar stjórnarformanns félagsins. Í viðtali sem birtist á samherji.is fjallar hann um uppbyggingu fyrirtækisins, stöðu íslensks sjávarútvegs og þær áskoranir sem greinin stendur frammi fyrir.

Jón bendir á að starfsemi Samherja hafi tekið miklum breytingum frá því hann sat í stjórn félagsins fyrir rúmum tveimur áratugum. Hann telur fjárfestingar í tækni, skipum og vinnsluhúsum hafa skipt sköpum fyrir framþróunina, og að félagið hafi náð að tengja framleiðslu og markað á árangursríkan hátt.

Þróunin í sjávarútvegi hefur að hans mati verið mikil, bæði hvað varðar tækni og fagmennsku. Íslensk fyrirtæki njóti virðingar á alþjóðlegum mörkuðum, meðal annars vegna hágæðaafurða og sjálfbærrar nýtingar auðlinda. Jón telur jafnframt að stærri fyrirtæki hafi yfirleitt meiri burði til að ráðast í nauðsynlegar fjárfestingar og endurnýjun, sem sé lykilatriði í alþjóðlegri samkeppni.

Jón minnir á að ramminn utan um greinina kveði á um ákveðin stærðarmörk fyrirtækja.

„Það og afstaða stjórnvalda er viss áskorun en við verðum einfaldlega að leita allra leiða til að gera reksturinn sem skilvirkastan, meðal annars með stöðugri framför í tækni og vöruþróun. Það þarf útsjónarsemi og fjárfestingar til að gera verðmæti úr sjávarauðlindinni og tryggja þar með samkeppnishæfni. Stærri fyrirtæki eru líklegri en þau minni til að hafa burði og getu til að ráðast í stórar fjárfestingar, svo sem endurnýjun skipa og landvinnslu.

Þegar slíkar ákvarðanir eru teknar þarf viss fyrirsjáanleiki að vera til staðar, annars er hætta á að stjórnendur fyrirtækjanna haldi að sér höndum og geri sem minnst. Núna er til dæmis uppi sú staða að endurnýjun skipaflotans er ekki nógu mikil, flotinn er einfaldlega að eldast. Þetta getur orðið til þess að verðmætasköpun verður minni, markmiðum í loftslagsmálum verður síður náð og svo framvegis. Stjórnvöld verða sem sagt að hafa ákveðinn skilning á atvinnugreininni og forðast eftir mætti að skapa óþarfa óvissu.“

Bás Samherja á sjávarútvegssýningunni í Barcelona. Mynd/Samherji

Hann leggur áherslu á mikilvægi stöðugleika og fyrirsjáanleika í rekstrarumhverfi sjávarútvegsins, svo fyrirtækin geti haldið áfram að fjárfesta og þróast. Að hans mati þarf einnig að halda áfram að efla nýsköpun og tækniþróun til að tryggja samkeppnishæfni íslenskra sjávarútvegsfyrirtækja.

Umhverfismál eru að mati Jóns einn helsti þátturinn sem mótar framtíð greinarinnar. Sjávarútvegurinn hafi dregið úr olíunotkun, aukið rafvæðingu og stuðli þannig að minni losun. Íslenskur fiskur sé veiddur með sjálfbærum hætti og hafi minna kolefnisspor en flestar sambærilegar afurðir erlendis.

Hann telur mannauðinn hjá Samherja helsta styrkleika félagsins og bendir á að félagið hafi byggt upp mikla þekkingu og reynslu á sviði sjávarútvegs og fiskeldis. Uppbygging í landeldi, meðal annars á Reykjanesi og í Öxarfirði, sé dæmi um framsækna stefnu sem tryggi áframhaldandi vöxt.

Jón Sigurðsson tók við formennsku í stjórn Samherja fyrr á þessu ári og segir að félagið standi vel að vígi til framtíðar. Hann lýsir Samherja sem fyrirtæki sem hafi áratuga hefð fyrir nýsköpun, framsýni og öflugum tengslum við íslenskan sjávarútveg.

„Baldvin Þorsteinsson er vel hæfur til að gegna þessu starfi og ég hlakka til að vinna með honum að ýmsum málum. Baldvin er vel menntaður og hefur tekið að sér margvísleg ábyrgðarstörf, sem hvortveggja kemur til með að nýtast honum vel í starfi. Með mér í stjórn er fólk með víðtæka reynslu og þekkingu, þannig að ég held bjartsýnn í þessa vegferð og er þakklátur fyrir það traust sem mér er sýnt með því að fela mér formennsku í stjórn félagsins,“ segir Jón.