Ný vöktunarsíða um sjávarhita

Í nýjasta tölublaði Ægis er sagt frá nýrri vöktunarsíðu Hafrannsóknastofnunar þar sem almenningur getur fylgst með hitastigi sjávar á ýmsum stöðum við landið. Á síðunni má sjá dagleg gögn úr mælum sem staðsettir eru meðal annars í Vestmannaeyjum, Grímsey, á Stöðvarfirði og við fleiri hafnir. Þar er einnig hægt að skoða þróun sjávarhita aftur í tímann.

Í greininni segir að tilgangur verkefnisins sé að gera upplýsingar um ástand sjávar aðgengilegar fyrir almenning, sjómenn og útgerðarfólk. „Við sjáum greinilega áhrif árstíðasveiflu og hvernig hlýnun sjávar hefur áhrif á lífríkið á hverjum stað,“ segir í umfjöllun Ægis.

Fram kemur að Hafrannsóknastofnun hyggist bæta við fleiri mælistöðvum á næstu misserum til að tryggja víðtækari yfirsýn yfir hitabreytingar í hafinu.