Síldveiðin fór hægt af stað

Síldarveiðar hjá skipum Síldarvinnslunnar eru hafnar að nýju eftir árshátíðarferð samstæðunnar til Póllands. Skipin Beitir NK og Börkur NK héldu til veiða vestur af landinu og var Beitir fyrstur á miðin. Að sögn Ólafs Gunnars Guðnasonar skipstjóra á Beiti gekk erfiðlega að finna síldina í upphafi. Hann segir að leitað hafi verið í Jökuldýpinu og Kolluálnum án árangurs, en þegar skipið var á leið í land fannst loks síld í Kolluálnum og þá hófst góð veiði. Aflinn í ferðinni varð 730 tonn sem landað var í Neskaupstað á laugardagskvöld og hófst vinnsla þegar í framhaldinu.

Þegar vinnslu úr Beiti lauk kom Börkur NK til hafnar með 1.670 tonn af síld. Hjörvar Hjálmarsson skipstjóri segir að þegar skipið kom á miðin hafi veiði verið lítil, en hún hafi glæðst þegar síld fannst í Kolluálnum. Hann segir að þar hafi verið um góða síld að ræða, 290–320 gramma að meðalþyngd, og að veiðin hafi batnað mjög eftir fyrstu holin.

Beitir hélt á ný til veiða strax eftir löndun en gera má ráð fyrir að það taki rúmlega tvo sólarhringa að vinna aflann úr Berki. Þriðja uppsjávarskip Síldarvinnslunnar, Barði NK, hélt til veiða á miðvikudagskvöld og var kominn með góðan afla í morgun.

Þetta kemur fram á vef Síldarvinnslunnar.