Atvinnustefna stjórnvalda: Mikil vaxtartækifæri í lagereldi

Stjórnvöld hafa birt til umsagnar drög að atvinnustefnu sem miðar að því að efla verðmætasköpun með fjölbreyttum útflutningi og sjálfbærri nýtingu auðlinda. Í stefnunni, sem sett er fram sem vaxtarplan til ársins 2035, er lögð sérstök áhersla á matvælageirann og þau tækifæri sem felast í bláa hagkerfinu.

Í drögum að stefnunni segir að útflutningur matvæla á Íslandi byggi fyrst og fremst á sjávarútvegi, þar sem alþjóðlega samkeppnishæfur rekstur hafi á undanförnum árum fjárfest verulega í nýsköpun og aukið framleiðni. Áherslan sé að tryggja áframhaldandi samkeppnishæfni sjávarútvegsins, sem sé ein af grunnstoðum íslensks útflutnings og verðmætasköpunar.

Þar kemur jafnframt fram að mikil vaxtartækifæri felist í lagareldi, bæði í sjó og á landi, og að sú starfsemi falli vel að markmiðum atvinnustefnunnar um aukna framleiðni, fjölbreyttari útflutning og vöxt í öllum landshlutum. Lögð er áhersla á að skapa skilyrði til að undirbyggja öflugan og sjálfbæran vöxt í þessum geira. Einnig er bent á önnur útflutningstækifæri í matvælum, meðal annars í hátækniframleiðslu próteina, ylrækt og hefðbundnum og óhefðbundnum landbúnaðarafurðum.

Í kynningu forsætisráðuneytisins á stefnunni segir að meginmarkmið hennar sé kröftugur vöxtur útflutnings sem byggi á atvinnugreinum með háa framleiðni. Stjórnvöld vilji styðja atvinnulíf þar sem framleiðni er há og alþjóðleg samkeppnishæfni mikil, auk þess sem leitast sé við að tryggja fjölbreytt störf um allt land. Þá sé mikilvægt að stefnan styðji við samdrátt í losun gróðurhúsalofttegunda í útflutningsgreinum.

Samráð um drögin stendur yfir til 5. desember og er almenningur hvattur til að kynna sér stefnuna og senda inn umsagnir. Niðurstöður samráðsins verða nýttar við áframhaldandi vinnu og stefnt er að því að endanleg atvinnustefna og aðgerðaáætlun verði gefnar út á fyrsta ársfjórðungi 2026.