Hitastig og útbreiðsla ískóðs

James Kennedy og Christophe S. Pampoulie sérfræðingar á Hafrannsóknastofnun hafa birt nýlega vísindagrein um tengsl útbreiðslu ískóðs, Boreogadus saida, og hitastigs sjávar í kringum Ísland. Þar kemur fram að hitastig sjávar við landið mótist af samspili hlýja Atlantshafsstraumsins frá suðri og kaldari pólsjávar frá norðri og að breytingar á þessum straumum hafi áhrif á lífsskilyrði lífvera.

Ískóð er smávaxin kaldsjávarfisktegund sem er mikilvæg fæða fyrir fiska, fugla og sjávarspendýr. Tegundin finnst norður og austur af Íslandi, sem eru syðri útbreiðslumörk hennar. Í greininni eru greind gögn úr stofnmælingum botnfiska að vori og hausti og sýna niðurstöður að ískóð veiðist jafnan í litlu magni en gefur engu að síður mikilvægar vísbendingar um útbreiðslu og æskilegan hita.

Rannsóknin sýnir að ískóð finnst helst á 350 til 500 metra dýpi og að á vorin veiðist fiskurinn sjaldan við hitastig yfir 3,5 gráðum. Í hlýjum árum dregst útbreiðslan saman og fiskurinn hörfar frá grunnsævi í norðri og norðvestri í dýpri og kaldari sjó. Þá kemur fram að hlýnun hafsins í kringum Ísland minnki búsvæði ískóðs, sem geti haft áhrif á þær tegundir sem nýta hann sem fæðu, að því er fram kemur í vísindagreininni.