Loðnurannsóknir í alþjóðlegu sérriti
Hafrannsóknastofnun hafði fyrir nokkru frumkvæði að útgáfu sérrits um loðnurannsóknir í alþjóðlega vísindatímaritinu Reviews in Fish Biology and Fisheries. Sérritið ber heitið Loðna á tímum umhverfisbreytinga og inniheldur sextán vísindagreinar um líffræði og vistfræði loðnu fjögurra helstu loðnustofna heimshafanna, það er stofnanna við Ísland, Austur-Grænland, Jan Mayen, í Barentshafi, við Nýfundnalands- og Labrador-landgrunn og í Kyrrahafi við Alaska. Þetta kemur fram í frétt á vef Hafrannsóknastofnunar.
Í greinum sérritsins er meðal annars fjallað um breytingar yfir áratugaskeið á útbreiðslu og magni loðnu, ásamt breytingum á göngumynstri og atferli sem skipta máli fyrir fiskveiðistjórnun. Einnig er fjallað um stofngerð og breytileika í lífsögu loðnustofnanna.
Vísindafólk Hafrannsóknastofnunar er fyrsti höfundur sjö greina í sérritinu. Greinarnar byggja á niðurstöðum átaksverkefnis um loðnurannsóknir sem stóð yfir á árunum 2018 til 2022 og voru jafnframt kynntar í samantektum í ritröðinni Haf- og Vatnarannsóknir árið 2023. Í greinunum er meðal annars fjallað um breytileika í lífmassa og umfangsmiklar breytingar á útbreiðslu loðnustofnsins við Ísland, Austur-Grænland og Jan Mayen síðustu tvo áratugi, tengsl þessara breytinga við lífsferilsbreytingar, nýja innsýn í útbreiðslu og þéttleika loðnulirfa og fæðusamsetningu á nýjum fæðusvæðum við Austur-Grænland.
Þá eru einnig kynntar rannsóknir á áhrifum lóðréttrar dreifingar loðnu á bergmálseiginleika hennar við mælingar á stofnstærð, sem og rannsóknir á umhverfisaðstæðum á fæðusvæðum stofnsins. Í sérritinu er jafnframt yfirlitsgrein um stöðu þekkingar á loðnu og hvaða vinnu þurfi að ráðast í til að innleiða vistkerfisnálgun við fiskveiðistjórnun loðnu.
Auk þessara sjö greina var sérfræðingur Hafrannsóknastofnunar meðhöfundur að grein um tengsl magns loðnu og eiginleika loðnutorfa yfir fæðutímabil hennar við Austur-Grænland, að því er fram kemur í fréttinni.
