Jóhanna Gísladóttir landar karfa í Grindavík

Ísfisktogarinn Jóhanna Gísladóttir GK landaði í heimahöfn í Grindavík á fimmtudaginn og aftur í dag. Aflinn hefur að mestu verið karfi. Skipstjóri í báðum túrunum var Smári Rúnar Hjálmtýsson.

Í samtali við heimasíðu Síldarvinnslunnar segir Smári Rúnar að í fyrri túrnum hafi verið veitt bæði karfa og þorsk. „Í fyrri túrnum vorum við með karfa og þorsk og fékkst aflinn í Kolluálnum og á Jökultungunni,“ segir hann. Í dag sé verið að landa fullfermi eftir þrjá til fjóra daga að veiðum og sé aflinn að mestu karfi. Veitt hafi verið við Snæfellsnes, í Kolluál og á Jökultungunni.

Smári Rúnar bendir á að erfiðara sé nú að fá þorsk í trollið vestan lands. „Staðreyndin er sú að það er heldur erfitt að fá þorsk í trollið hér fyrir vestan landið núna þó hann veiðist vel bæði á línu og í net. Þorskurinn er dreifður og það hentar togurunum illa,“ segir hann.

Að lokinni löndun mun Jóhanna Gísladóttir halda á ný til veiða. Þetta kemur fram á vef Síldarvinnslunnar.