Vestmannaeyjar í Fish Focus
Breska sjávarútvegsblaðið Fish Focus hefur gefið út sérstakt tölublað helgað Íslandi, þar sem Vestmannaeyjar eru í aðalhlutverki. Í blaðinu er greint frá heimsókn blaðamanna Fish Focus til landsins, þar sem þeir kynntu sér íslenskan sjávarútveg, samfélög, fyrirtæki og tengsl atvinnulífs og mannlífs, með sérstakri áherslu á Vestmannaeyjar.
Í blaðinu er fjallað ítarlega um stöðu og þróun sjávarútvegs í Vestmannaeyjum og þau fyrirtæki sem þar starfa. Meðal annars er greint frá starfsemi Vinnslustöðvarinnar hf. þar sem farið er yfir sögu fyrirtækisins, veiðar, vinnslu og útflutning, auk þess sem dregin er upp mynd af mikilvægi fyrirtækisins fyrir samfélagið í Eyjum. Einnig er fjallað um Ísfélag hf. í Vestmannaeyjum, starfsemi félagsins í veiðum, vinnslu og framleiðslu fiskmjöls og lýsis, og þá innviði sem styðja við útgerð og atvinnulíf á eyjunum.
Þá er í blaðinu sagt frá laxeldisverkefni Laxey í Vestmannaeyjum, þar sem fjallað er um uppbyggingu landeldisstöðvar, framleiðsluferli og áform um framtíðarvöxt. Auk sjávarútvegs er einnig vikið að nýsköpun og samfélagsstarfi í Eyjum, meðal annars með umfjöllun um Fab Lab Vestmannaeyjar, þar sem ný tækni, menntun og frumkvöðlastarf eru í forgrunni.
Í blaðinu er jafnframt fjallað um náttúru og sögu Vestmannaeyja, þar á meðal Eldfellsgosið, Surtsey, fuglalíf eyjanna og Þjóðhátíð, sem dregur fram samspil náttúru, menningar og atvinnulífs.
