Hætt við kröfu um 100% eignarhald í strandveiðum

Fallið hefur verið frá áformum um að gera kröfu um 100% eignarhald til að fá strandveiðileyfi samkvæmt nýrri reglugerð um strandveiðar sem tók gildi 12. febrúar. Þess í stað er kveðið á um að eigandi fiskiskips með strandveiðileyfi skuli eiga beint eða óbeint meira en 50% eignarhlut í skipinu.

Í 3. grein reglugerðarinnar segir að eigandi fiskiskips með strandveiðileyfi skuli eiga „beint, eða óbeint í gegnum lögaðila sem hann fer með meirihluta eignarhluta í, meira en 50% eignarhlut í skipinu“ . Þá er jafnframt kveðið á um að eigandi lögaðila sem er lögskráður á skip á strandveiðitímabilinu skuli eiga meira en 50% í viðkomandi lögaðila.

Með þessu er ljóst að ekki verður gerð krafa um fullt, 100% eignarhald eins og áður hafði verið rætt, heldur nægir meirihlutaeign til að uppfylla skilyrði reglugerðarinnar. Eignarhald ræðst af skráningu í skipaskrá Samgöngustofu og skráningu raunverulegs eiganda hjá fyrirtækjaskrá ríkisskattstjóra.

Reglugerðin kveður einnig á um að aðeins sé heimilt að veita hverri útgerð, eiganda eða lögaðila leyfi til strandveiða fyrir eitt skip og að enginn eigenda lögaðila sem á skip með strandveiðileyfi geti átt aðild að nema einu slíku leyfi .

Þá er áréttað að sá sem fer með meirihlutaeign í skipinu skuli vera um borð í hverri strandveiðiferð og vera lögskráður á skipið .

Reglugerðin er sett með heimild í lögum um stjórn fiskveiða og felur jafnframt í sér að eldri reglugerð um strandveiðar fellur úr gildi .