Söfnuðu yfir 1.200 tonnum til endurvinnslu
Hampiðjan Ísland safnaði alls 1.229 tonnum af notuðum veiðarfærum og tengdum búnaði til endurvinnslu á árinu 2025. Þetta kemur fram í tilkynningu frá fyrirtækinu.
Megnið af efninu kemur frá útgerðum sem skila notuðum veiðarfærum til flokkunar og endurvinnslu en einnig fellur til efni hjá fyrirtækinu sjálfu við framleiðslu. Magn endurvinnslunnar hefur haldist nokkuð stöðugt undanfarin ár og verið á bilinu 1.100 til 1.300 tonn á ári. Til samanburðar fóru um 1.128 tonn í endurvinnslu árið 2023 og 1.295 tonn árið 2024.
Stærsti einstaki efnisflokkurinn árið 2025 var rockhopper-búnaður, um 311 tonn. Þá fóru um 244 tonn af nylon úr veiðarfærum í endurvinnslu og 66 tonn úr fiskeldisnetum. Einnig voru endurunnin um 147 tonn af PE-veiðarfærum og 109 tonn af polypropylene köðlum. Um 212 tonn reyndust hins vegar ekki henta til hefðbundinnar efnisendurvinnslu og fóru í orkuendurvinnslu.
Málmar voru endurunnir hér á landi en önnur efni send erlendis, alls í 62 fjörutíu feta gámum. Þar voru send 1.122 tonn af plastefnum á meðan innflutningur Hampiðjunnar á sambærilegu efni nam 976 tonnum. Það þýðir að um 15% meira var flutt út en inn og er þannig gengið á uppsafnaðar birgðir af notuðum veiðarfærum.
Efnið var sent til sérhæfðra endurvinnsluaðila eftir eðli þess. Stærsti hluti fór til norska fyrirtækisins Nofir, um 530 tonn. Þá fóru um 205 tonn til danska fyrirtækisins Plastix og 85 tonn til litháíska fyrirtækisins Polivektris. Einnig fóru um 311 tonn til Granuband í Hollandi auk minna magns til annarra aðila.
Í tilkynningu Hampiðjunnar kemur fram að endurvinnsla notaðra veiðarfæra sé orðin fastur þáttur í starfsemi greinarinnar. Með aukinni flokkun og bættri tækni hafi tekist að koma sífellt stærri hluta efnis aftur inn í hringrás hráefna, þar sem samstarf fyrirtækja í veiðarfæragerð, útgerða og endurvinnsluaðila gegni lykilhlutverki.
