Birtingur heldur í prufutúr

Birtingur, nýr ferskfisktogari Síldarvinnslunnar, hélt til veiða frá Hafnarfirði í nótt en um prufutúr er að ræða. Gert er ráð fyrir að skipið komi að landi í fyrramálið og hefji síðan veiðar af fullum krafti eftir páskahátíðina. Þetta kemur fram á vef Síldarvinnslunnar.

Haustið 2024 festi Síldarvinnslan kaup á skipinu, sem þá hét Þórir SF og var í eigu Skinneyjar – Þinganess á Hornafirði. Við eigendaskiptin fékk skipið nafnið Birtingur. Skipið hefur að mestu legið í Hafnarfjarðarhöfn frá þeim tíma og þar hefur verið unnið að ýmsum umbótum á því að sögn Grétars Arnar Sigfinnssonar rekstrarstjóra útgerðar fyrirtækisins.

Birtingur var smíðaður í Taívan árið 2009 og er 637 brúttótonn að stærð. Árið 2019 voru gerðar umfangsmiklar breytingar á skipinu og var það meðal annars lengt um 10 metra. Í skipinu er fullkominn vinnslubúnaður og spilkerfi þess hefur að miklu leyti verið endurnýjaður.

Skipið verður gert út í stað togaranna Jóhönnu Gísladóttur GK og Gullvers NS. Tvær áhafnir verða á skipinu og verða Hjálmar Ólafur Bjarnason og Einar Ólafur Ágústsson skipstjórar.