Vorfundur smábátasjómanna vel sóttur

Vorfundur smábátasjómanna var haldinn 9. apríl í fyrsta sinn í samstarfi Landssambands smábátaeigenda, Samgöngustofu og Slysvarnafélagsins Landsbjargar. Þetta kemur fram á vef Landssambands smábátaeigenda.

Fundinum var streymt á netinu frá skólaskipinu Sæbjörgu í Reykjavíkurhöfn og jafnframt var sjómönnum víða um land boðið að koma saman í húsnæði eininga Slysvarnafélagsins Landsbjargar til að fylgjast með útsendingunni.

Góð þátttaka var á fundinum en miðað við fjölda sem opnuðu streymið og mættu á samkomustaði er áætlað að um 400 manns hafi fylgst með.

Fundurinn verður áfram aðgengilegur á heimasvæði hans á island.is, að því er fram kemur í tilkynningunni.