Flow Gear reynist vel á Björgu

Ný gerð hopparalengju frá Hampiðjunni og Mørenot hefur verið tekin í notkun um borð í togaranum Björgu EA 7 með góðum árangri. Búnaðurinn, sem kallast Flow Gear, er þegar kominn í notkun á nokkrum skipum erlendis og bendir þróunin til vaxandi áhuga á lausninni.

Flow Gear lengjan er frábrugðin hefðbundnum gúmmíhopparalengjum að því leyti að hún er byggð upp af hálfhringlaga plasteiningum. Sú hönnun gerir það að verkum að aðeins hlutar lengjunnar lyftast þegar hún fer yfir hindranir á botni, sem skilar betri veiðni við krefjandi aðstæður.

Íslenskar aðstæður eru þó harðari en víða annars staðar og því var búnaðurinn þróaður áfram í samstarfi við Samherja. Prófanir hafa staðið yfir á Björgu frá miðjum janúar og hefur áhöfn skipsins tekið virkan þátt í þróunarvinnunni.

Meðal endurbóta eru sterkari hönnun sem þolir betur álag á grýttum botni, bættir slitfletir og breytingar sem koma í veg fyrir að net rifni eða festist. Þá hefur verið skipt út keðjum fyrir mjúkt ofurtóg sem dregur úr bilunum.

Samkvæmt Hampiðjunni benda prófanir til að Flow Gear lengjan bæti opnun og stöðugleika trollsins og geti aukið veiðar þar sem vatnsflæði yfir hana leiðir fisk betur inn í veiðarfærið. Einnig hefur verið horft til umhverfisáhrifa og hefur lengjan minni áhrif á botninn en hefðbundnar lausnir.

Lengjan er jafnframt um sex tonnum léttari en sambærileg gúmmíhopparalengja og því meðfærilegri í notkun um borð.

Með nýjustu endurbótum telja framleiðendur að búnaðurinn sé orðinn nægilega þróaður fyrir íslenskar aðstæður og tilbúinn til almennrar sölu.