Togarar Bergs – Hugins fiska vel

Ísfisktogarar Bergs – Hugins í Vestmannaeyjum, Bergey VE og Vestmannaey VE, hafa fiskað vel að undanförnu þrátt fyrir breytilegt veður og stutta túra. Þetta kemur fram í frétt á vef Síldarvinnslunnar.

Bergey hefur verið á veiðum í Grindavíkurdýpinu og segir Jón Valgeirsson skipstjóri aflabrögðin góð. „Við lönduðum fullfermi af karfa í Grindavík þann 30. apríl og lönduðum þar aftur á sunnudag og þá var aflinn að mestu karfi en dálítil ýsa með. Í báðum túrum var veitt í Grindavíkurdýpinu þannig að það var stutt að fara. Í fyrri túrnum var haugabræla en fínt veður í þeim seinni,“ segir Jón. Bergey hélt aftur til veiða í gærkvöldi og er karfi áfram á dagskrá.

Vestmannaey hefur einnig landað fullfermi í Grindavík í tveimur síðustu túrum. Skipið hefur verið við veiðar á Selvogsbankanum þar sem aflinn hefur einkum verið ýsa. Egill Guðni Guðnason skipstjóri segir túrana stutta, um tvo daga í senn, og er ánægður með veiðarnar. „Við höfum verið að veiðum á Selvogsbankanum og aflinn hefur mest verið ýsa. Túrarnir hafa verið stuttir eða um það bil tveir dagar. Veðrið hefur verið tiltölulega gott en mér finnst þó vanta lofthitann, hiti vorsins lætur bíða eftir sér,“ segir Egill Guðni.