Fimmtíu ár frá viðurkenningu Breta á 200 mílum
Fimmtíu ár eru í dag liðin frá því að Bretar viðurkenndu 200 sjómílna efnahagslögsögu Íslands með undirritun samkomulags í Osló 1. júní 1976. Þetta rifjar Landhelgisgæsla Íslands upp í færslu á Facebook-síðu sinni.
Í færslunni kemur fram að samningurinn hafi markað endalok þorskastríðanna og falið í sér að Bretar viðurkenndu að þeir hefðu ekki heimild til veiða innan 200 sjómílna fiskveiðilögsögu Íslands. Þegar fiskveiðilögsagan var færð út í 200 sjómílur í október 1975 stækkaði hún úr 216 þúsund ferkílómetrum í tæplega 760 þúsund ferkílómetra.
Landhelgisgæslan rifjar einnig upp orð Geirs Hallgrímssonar þáverandi forsætisráðherra sem sagði við útfærsluna að lífsbjörg þjóðarinnar væri í veði og að sigur myndi vinnast með fullum yfirráðum Íslendinga yfir fiskimiðunum.
Samningurinn frá 1. júní 1976 fól í sér að 24 breskir togarar fengju að veiða innan lögsögunnar til 1. desember sama ár, en ekki lengur. Þar með lauk áratugalöngum deilum og átökum um fiskveiðiréttindi við Ísland.
Af þessu tilefni segir Landhelgisgæslan frá þekktri ljósmynd Jóns Páls Ásgeirssonar stýrimanns af Halldóri Nellett, þáverandi háseta á varðskipinu Baldri, þar sem hann gengur frá togvíraklippunum eftir að samningar höfðu náðst. Á dögunum endurgerðu þeir félagar myndina um borð í safnskipinu Óðni í tilefni tímamótanna.
Þetta kemur fram í færslu Landhelgisgæslu Íslands á Facebook. Þaðan eru meðfylgjandi myndir fengnar.
