Hafrannsóknastofnun leggur til lægra aflamark fyrir þrjár stærstu botnfisktegundir landsins á fiskveiðiárinu 2026/2027 samkvæmt nýrri ráðgjöf sem kynnt var í dag. Þorskur lækkar um 1%, ýsa um 20% og ufsi um 16%.
Ráðlagður heildarafli þorsks verður 201.674 tonn á næsta fiskveiðiári, samanborið við 203.822 tonn á yfirstandandi ári. Samkvæmt Hafrannsóknastofnun skýrist lækkunin meðal annars af því að árgangar frá 2021 og 2022 eru undir meðallagi auk þess sem árgangar frá 2019 til 2021 hafa verið hægvaxta. Talið er að minni loðnustofn undanfarin ár hafi haft áhrif á vöxt þeirra.
Mestur er samdrátturinn í ýsu. Hafrannsóknastofnun ráðleggur aflamark upp á 63.206 tonn sem er 20% lækkun frá yfirstandandi fiskveiðiári. Stofnunin bendir á að viðmiðunarstofn ýsu hafi minnkað frá því að hann náði hámarki árið 2024 og að nýliðun hafi verið minni á árunum 2022 til 2024. Hins vegar séu vísbendingar um að árgangurinn frá 2025 sé stór.
Ráðgjöf fyrir ufsa lækkar einnig verulega eða um 16% og nemur nú 49.887 tonnum. Lækkunin stafar af lægra mati á stærð viðmiðunarstofns ufsa.
Á móti kemur að ráðgjöf fyrir gullkarfa hækkar um 5% í 43.319 tonn og ráðgjöf fyrir grálúðu er nær óbreytt, 21.079 tonn. Þá er lagt til að aflamark djúpkarfa verði áfram núll tonn þar sem hrygningarstofn tegundarinnar er enn undir varúðarmörkum.
Mikil aukning er hins vegar í loðnuráðgjöfinni. Hafrannsóknastofnun leggur til upphafsaflamark upp á 358.044 tonn fyrir komandi vertíð, sem er 81% meira en lokaráðgjöf síðasta fiskveiðiárs. Ráðgjöfin verður endurskoðuð að loknum haustleiðangri.
Ráðgjöf fyrir íslenska sumargotssíld lækkar um 22% og verður 80.307 tonn.
Þetta kemur fram í nýrri ráðgjöf Hafrannsóknastofnunar um nytjastofna og aflamörk fyrir fiskveiðiárið 2026/2027.
