Mótmælandi sigldi með Hval 9 í Hvalfjörð

Hvalveiðiskipið Hvalur 9 sigldi síðdegis í dag frá Reykjavíkurhöfn til Hvalfjarðar með mótmælanda um borð eftir óvenjulega atburðarás.

Mótmælandinn Hólmsteinn Harðarson kom sér fyrir í tunnu í mastri skipsins í mótmælaskyni gegn hvalveiðum og neitaði að fara niður. Þegar Hvalur 9 lét úr höfn um klukkan 17 sat hann enn í tunnunni og hafði áður lýst því yfir að færi skipið af stað myndi hann sigla með því.

Ágreiningur er um stöðu Hólmsteins um borð. Samkvæmt áhöfn skipsins var hann skráður sem farþegi með hans leyfi áður en siglt var af stað. Hólmsteinn segir hins vegar að hann hafi ekki veitt slíkt samþykki, þótt hann hafi afhent nafn sitt, kennitölu og aðrar persónuupplýsingar þegar eftir þeim var óskað.

Þegar Hvalur 9 kom til hafnar í Hvalfirði var Hólmsteinn enn í tunnunni. Samkvæmt mbl.is var þá hafin umræða við hann um næstu skref og maður kominn upp í hans hæð með aðstoð kranabíls. Formaður Hvalavina, Valgerður Árnadóttir, sagði við fjölmiðla að hún hefði ekki náð sambandi við Hólmstein eftir að skipið lagði úr höfn og taldi líklegt að sími hans væri orðinn rafmagnslaus.

Valgerður gagnrýndi einnig þá ákvörðun að sigla með mótmælandann um borð. Hún sagði í samtali við Vísi að samkvæmt þeim lögfræðingum sem hún hefði rætt við kynni málið að varða við siglingalög og taldi það alvarlegt.

Lögregla kom að málinu fyrr um daginn en samkvæmt upplýsingum frá lögreglu var ekki óskað eftir aðstoð við að fjarlægja mótmælandann úr mastrinu.

Hvalur 9 er á leið í undirbúning fyrir komandi hvalveiðivertíð og er gert ráð fyrir að skipið haldi til veiða á næstu dögum.