Börkur og Beitir leita makríls við Ísland

Uppsjávarskip Síldarvinnslunnar, Börkur NK og Beitir NK, héldu til makrílveiða í gærkvöldi. Skipstjórarnir ætla að hefja leit að makríl djúpt suðaustur af landinu þar sem kolmunnaskip hafa nýlega orðið vör við talsvert af makríl.

Í samtali við heimasíðu Síldarvinnslunnar segir Hjörvar Hjálmarsson, skipstjóri á Berki, að fyrst verði leitað á svæðum á borð við Litladýpi, Hvalbakshalla, Rósagarð, Þórsbanka og Verkamannabanka. Að hans sögn er vonast til að þar finnist stór og vel holdaður makríll, auk þess sem miðin eru mun styttri sigling frá landi en Smugan.

Ef lítið reynist af makríl innan íslenskrar lögsögu verður stefnan tekin á Smuguna. Hjörvar bendir á að þangað sé um 200 sjómílum lengra að sigla en á miðin suðaustur af landinu og því sé eðlilegt að kanna íslensku miðin fyrst.

Bæði Hjörvar Hjálmarsson á Berki og Tómas Kárason, skipstjóri á Beiti, segjast spenntir fyrir upphafi makrílvertíðarinnar. Nýlegar fregnir af makríllóðningum á kolmunnamiðunum gefa skipverjum vonir um að vertíðin fari vel af stað.