-->

Aukin aðkoma Fiskistofu að Sjávarútvegsskóla SÞ

Ár hvert kemur hópur háskólamenntaðra nema hvaðanæva að úr heiminum í sex mánaða nám í sjávarútvegsfræðum á vegum Þekkingarmiðstöðvar þróunarsamvinnu (GRÓ). Miðstöðin starfrækir sjávarútvegsskóla, jafnréttisskóla, jarðhitaskóla og landgræðsluskóla undir merkjum Háskóla Sameinuðu þjóðanna. Fiskistofa hefur um árabil tekið þátt í þessari starfsemi með því að taka á móti og fræða nema um sjávarútvegsmál og fiskveiðistjórnun.

Háskólinn á Akureyri sem sér um hluta af fræðslunni í sjávarútvegsskóla GRÓ og Fiskistofa hafa nú gert með sér samkomulag um aukna aðkomu Fiskistofu að kennslu og leiðsögn fyrir þá nema sem leggja áherslu á nám í fiskveiðistjórnun.

Fyrr í mánuðinum kom því hópur nemenda Sjávarútvegsskólans í nokkurra daga fræðslu hjá Fiskistofu á Akureyri. Starfsmenn Fiskistofu fræddu nemana um fiskveiðistjórnun á Íslandi og sögu hennar, kvótakerfið, gagnavinnslu, nýjungar í rafrænu eftirliti og lögfræðilegar áskoranir sem þær geta haft í för með sér. Í nokkrum tilfellum munu starfsmenn Fiskistofu leiðbeina nemum í hópnum við lokaverkefni sem þau vinna að frá desember fram til loka febrúar. Ætlunin er að þróa þetta samstarf Fiskistofu og Háskólans áfram næstu árin.

Nemendurnir fóru m.a. í vettvangsferð með eftirlitsmönnum Fiskistofu þar sem dróni var notaður til að fylgjast með vinnubrögðum línubáts úti á Eyjafirði. Ekki sást neitt misjafnt í gangi um borð í bátnum. Til marks um hversu drónaeftirlitið er öflugt má geta þess að hægt var að sjá þegar  lífvænlegri tindabikkju var sleppt af króknum og skilað í sjóinn eins og leyfilegt er.  Meðfylgjandi mynd úr drónanum sýnir nemana og starfsmenn Fiskistofu fylgjast spennt með þegar dróninn kom inn til lendingar eftir vel heppnaða eftirlitsferð.

Tengdar færslur

thumbnail
hover

Mikið óveitt af ufsa

Mikið er óveitt af ufsa nú þegar fiskveiðiárinu er að ljúka. Það er svipuð staða og í fyrra. Kvótinn nú er 78.700 tonn, aflin...

thumbnail
hover

ISI tapaði 300 milljónum

Iceland Seafood International (ISI) tapaði 2,1 milljón evra á öðrum ársfjórðungi eða sem nemur 296 milljónum á gengi dagsins, að...

thumbnail
hover

Eimskip hagnast um 5 milljarða

Tekjur Eimskips á öðrum ársfjórðung námu 283,1 milljón evra sem er 34,1% aukning samanborið við annan ársfjórðung í fyrra. Rek...