-->

Bleikja Wellington

Fiskeldi á Íslandi vex stöðugt fiskur um hrygg. Laxeldi í sjó á Vestfjörðum og Austfjörðum er að gjörbylta atvinnu- og búsetumöguleikum á þeim stöðum, þar sem það er stundað og skilar miklum tekjum og gjaldeyri í þjóðarbúið að auki. Ekki fer á milli mála að fiskeldið er að skjóta frekari stoðum undir efnahag landsins og styrkja búsetu í dreifðari byggðum landsins.
Fyrir utan laxinn hafa Íslendingar alið bleikju til útflutnings um langt skeið. Ísland er stærsti framleiðandi heims á bleikju úr eldi og er Samherji fiskeldi stærsti einstaki framleiðandi á bleikju í heiminum. Því bjóðum við upp á uppskrift að bleikju að þessu sinni.

Innihald:

  • 800g bleikjuflök í fjórum jöfnum stykkjum, roð- og beinlaus
  • salt og sítrónupipar
  • 2 msk. smjör
  • 3 geirar af hvítlauk, maukaðir
  • 1 vorlaukur, saxaður
  • 1 dl hvítvín
  • 100g rjómaostur
  • 150g ferskt spínat
  • 2 msk. brauðmylsna
  • ¼ bolli rifinn parmesan ostur
  • 1 pakkning af smjördegi, um það bil ½ kíló
  • 1 egg

Aðferð:

Kryddið bleikjuna með salti og sítrónupipar.

Hitið smjör á pönnu og mýkið hvítlaukinn og vorlaukinn á henni á miðlungshita.

Hækkið hitann og bætið hvítvíninu út á. Látið það krauma í 5 mínútur og bætið síðan rjómaostinum út á og látið krauma í 1 mínútu.

Bætið loks spínatinu, brauðmylsnunni og parmesan ostinum út á og látið malla þar til spínatið er orðið mjúkt.

Takið smjördeigið og fletjið út í hæfilega stærð fyrir bleikjubitana fjóra.

Leggið bleikjubitana ofan á deigið og gætið þess að það sé nógu stórt til að hægt sé að loka „pakkanum“

Deilið spínatblöndunni í fernt og smyrjið ofan á hvern bita fyrir sig. Penslið eggjarauðu á brúnir deigsins og lokið „pakkanum“ með gaffli. Leggið pakkana á bökunarpappír í ofnskúffu með samskeytin niður. Skerið munstur í deigið að ofan og penslið með eggjarauðunni.

Bakið bleikjuna í 25 til 30 mínútur við 180°C eða þar til deigið er orðið fallega gullið.

Berið fram með fersku salati að eigin vali, hrísgrjónum og grænmetis- eða hvítlaukssósu.

Tengdar færslur

thumbnail
hover

Kolmunnaskipin bíða skimunar

Kolmunnaskipin liggja enn í Norðfjarðarhöfn og bíða áhafnir þeirra eftir niðurstöðu skimunar fyrir Covid-19. Ráðgert er að hal...

thumbnail
hover

Lítil sókn í grásleppuna

Lágt afurðaverð hefur dregið úr sókn í grásleppuveiðar í upphafi vertíðar. Kínverjar kaupa enga grásleppu og hrognaverð er l...

thumbnail
hover

Fiskverð lækkar

Á fundi hagsmunasamtaka sjómanna og útvegsmanna, sem haldinn var 3. apríl 2020, var ákveðið að breyta viðmiðunarverði skv. kjara...