Ekkert bendir til spillingar í öðrum löndum
Forsvarsmenn Samherja hafa ákveðið að hraða för fyrirtækisins frá Namibíu og hætta starfsemi sinni í landinu fyrr en áætlað var. Þetta staðfestir Geir Sviggum, hjá norsku lögmannsstofunni Wikborn Rein í samtali við norska miðilinn DN. Fréttablaðið greinir frá þessu.
Líkt og Fréttablaðið hefur greint frá hefur Björgólfur Jóhannsson, forstjóri félagsins, áður tekið fram að félagið hafi árið 2017 ákveðið að hætta starfsemi í Namibíu. Nú er ljóst miðað við svör Geirs að það hefur ákveðið að hraða ferlinu.
Í frétt DN er tekið fram að Geir Sviggum sé nýkominn heim frá Íslandi, ásamt Elísabetu Roscher, þar sem þau funduðu með forsvarsmönnum fyrirtækisins. Samherji réð lögmannsstofuna til að annast innri rannsókn á viðskiptum þess í Namibíu. „Planið er að vera komin út úr Namibíu innan nokkurra mánaða,“ segir Geir.
Í fréttinni er jafnframt tekið fram að starfsemi Samherja nái til tólf landa og að 55 prósent tekna þess komi erlendis frá. Geir segir að enn sem komið er hafi ekkert komið upp í rannsókn lögmannsstofunnar sem bendi til þess að ásakanir um spillingu eða peningaþvætti nái til starfsemi þess í öðrum löndum.
„Vinna okkar hingað til bendir til þess að ásakanirnar einskorðist við starfsemi fyrirtækisins í Namibíu,“ er haft eftir Geir.
„Fyrirtækið vill ljúka öllu og tryggja gagnsæi vegna niðurstaðnanna. Ef við finnum gagnrýnisverða punkta, þá ætti að vera tekið á þeim. Fyrirtækið vill læra,“ er haft eftir Geir. Þá er jafnframt haft eftir honum að Þorsteinn Már Baldvinsson taki ásökunum „af hryllilegum þunga.“
„Þegar þú rekur fyrirtæki og það gengur svona vel og skapar svona mikið af störfum og færð svo svona ásakanir í hendurnar, þá brennur inni í þér þörfin á því að komast til botns í málinu.“