-->

Fá sumarvinnu í fiskinum

Mikill fjöldi ungmenna á aldrinum 16-23 ára fær vinnu hjá sjávarútvegsfyrirtækjum um allt land í sumar. Flest starfanna eru annað hvort í fiskvinnslu eða í umhverfisverkefnum á svæði sjávarútvegsfyrirtækjanna. Í sumar mun Samherji ráða til sín yfir 100 ungmenni, flest í landvinnslu bæði á Akureyri og Dalvík en þó munu nokkur þeirra starfa við sjómennsku. Frá þessu er sagt á heimasíðu LÍÚ.

Humar í sumar

Ásgeir Gunnarsson, útgerðarstjóri, hjá Skinney-Þinganesi á Höfn í Hornafirði segir fyrirtækið ráða um 70 manns til vinnu á aldrinum 16-20 ára. „Það er sérstaklega gaman að sjá hvað margir vilja vinna hjá okkur ár eftir ár. Hópurinn sinnir fjölbreyttum störfum í viðhaldi og fegrun umhverfisins þótt flestir vinni í störfum tengdum humarveiðum og vinnslu.“

„Við náum því miður ekki að ráða alla sem sækja um en sem betur fer hefur ferðaþjónustan vaxið mikið á svæðinu undanfarin ár auk þess sem margir úr þessum aldurshópi vinna í bæjarvinnunni. Hér er því ekkert atvinnuleysi meðal þessa hóps yfir sumarmánuðina,“ segir Ásgeir.

Harðduglegir krakkar

„Við réðum 36 harðduglega krakka til  okkar í sumar,“ segir Einar Valur Kristjánsson, framkvæmdastjóri hjá Hraðfrystihúsinu- Gunnvöru hf í Hnífsdal. „Margir þeirra hafa unnið hjá okkur áður auk þess sem foreldrar margra þeirra starfa hjá fyrirtækinu. Þau sinna ýmsum störfum, þó aðallega í vinnslu,“ segir Einar. Hópurinn er á aldrinum 16-23 ára.

Setur skemmtilegan svip á fyrirtækið

Sömu sögu er að segja frá Neskaupstað þar sem 70 ungmenni voru nýverið ráðin til sumarstarfa hjá Síldarvinnslunni. Hópurinn vinnur annars vegar við fiskiðjuver og hins vegar í umhverfisverkefnum á svæðinu. „Við höfum alltaf lagt mikið upp úr því að fá ungt fólk til starfa hjá Síldarvinnslunni enda setur hópurinn skemmtilegan svip á fyrirtækið,“ segir Gunnþór Ingvason, framkvæmdastjóri.
Á meðfylgjandi mynd er ungt fólk í fiskinum hjá Skinney-Þinganesi á Hornafirði.