-->

Hvalaskoðunarsvæði verði óbreytt

„Samtök ferðaþjónustunnar hvetja sjávarútvegsráðherra eindregið að afturkalla ekki ákvörðun forvera síns um stækkun hvalaskoðunarsvæðis í Faxaflóa, en hann ræddi þetta mál á Stöð 2 8. júní s.l.,“ segir í frétt frá Samtökunum. Fulltrúar hrefnuveiðimanna gengu á fund sjávarútvegsráðherra hinn 6. júní síðastliðinn til að fara fram á slíka afturköllun. Frá því var greint á kvotinn.is sama dag.

„Hvalaskoðun er ein af meginstoðum ferðaþjónustunnar á Íslandi og sú grein sem vaxið hefur hvað hraðast á síðustu árum. Um er að ræða stærsta afþreyingariðnað ferðamanna á höfuðborgarsvæðinu sem hefur margvísleg margföldunaráhrif á aðrar greinar ferðaþjónustu. Veltan í hvalaskoðun er margfalt meiri en í hrefnuveiðum og gegnir þessi grein mikilvægu hlutverki varðandi ímynd Íslands og við landkynningu,“ segir í frétt SAF. Þar segir ennfremur:
„Samtök hrefnuveiðimanna hafa lýst því yfir að 80% veiðanna hafi undanfarin ár verið innan núverandi hvalaskoðunarsvæðis í Faxaflóa. Það eitt er sönnun þess að hrefnuveiðimenn hafa verið að veiða sömu dýrin og hvalaskoðunin hefur byggt afkomu sína á. Þetta er þegar farið að bitna á hvalaskoðuninni og mun hafa alvarlegar afleiðingar fyrir greinina ef núverandi hvalaskoðunarvæði yrði minnkað aftur til fyrra horfs en sífellt færri hrefnur sjást í ferðunum.
Samtök ferðaþjónustunnar hafa í mörg ár óskað eindregið eftir því að hvalaskoðunarsvæðið á Faxaflóa verði stækkað.  Því skora samtökin á sjávarútvegsráðherra að afturkalla ekki umrædda reglugerð án viðtæks samráðs við alla hagsmunaaðila og þá aðeins með þeim möguleika að stækka svæðið enn frekar til samræmis við áður framkomnar óskir Hvalaskoðunarsamtaka Íslands og SAF,“segir í fréttinni.
Á myndinni er hnúfubakur á Faxaflóa. Ljósmynd Hjörtur Gíslason